動物農莊

《動物農莊廣東話版》係我繼《小王子廣東話版》之後，第二個對粵文翻譯文學作出嘅嘗試。長久以嚟，廣東話主要被視為一個口語載體，縱然粵文寫作經常以各種形式存在，但用喺比較嚴肅嘅場合，相對而言係較為近年嘅事。粵文寫作一直受限於各種有音無字、一字多義、一義多字同難以追溯本字等情況；再加上香港語境經常中英夾雜，導致部份名詞幾乎搵唔到廣泛接受嘅漢字翻譯（例如BB），都增加咗粵文寫作嘅難度。利用粵文翻譯經典文學，一定程度上係想透過實踐去完善呢套書寫系統，提出一啲書寫建議。所以，秉承前作嘅理念，今次同樣以粵文作為一個文學載體為出發點，希望盡量以通而不俗嘅文字，將一部經典作品以我哋香港人熟悉嘅廣東話／粵文呈現出嚟。

作為一部文學作品，咬文嚼字係必要嘅。因此今次翻譯亦份外着重對幾首歌謠詩句嘅處理，務求盡量保留當中嘅文學形式。此外，喺大時代讀呢部敵托邦經典，香港讀者或者會發現，書中故事同現實世界之間存在唔少可以類比嘅地方；有唔少情節，都好容易令人聯想起一啲我哋耳熟能詳嘅政治套語。的確，如果直接套用呢啲詞語，對本地讀者嚟講會有某程度嘅「親切感」。不過，喺翻譯呢本書嘅時候，我主要着眼點，係在於點樣可以以地道廣東話演繹呢部作品，所以並唔想令成本書充斥呢類外來用語，變得唔鹹唔淡、過份生硬。因此，喺遣詞用字上，都以忠於原著為原則，盡量避免不必要嘅政治套語。

另一方面，作為一個粵文書寫嘅小實驗，只用漢字、唔中英夾雜係一大原則，亦係其中一項最大嘅挑戰。喺處理冇標準寫法嘅字詞嗰陣，一般都會先參考有關字詞嘅本字學說，如果本字能寫易讀，就盡量用本字。不過好多時候，學術界對呢啲本字都存有爭議，又或者有時本字太生僻，本書就會選用較為通用嘅通假字。總而言之，我對使用「本字」、「正字」係冇一份堅持嘅。但我對用字嘅規範化有一份執着，相信規範化長遠對粵文嘅流通同學習都有裨益，亦希望本書能夠喺呢方面作出少少貢獻。

另外，句末助詞喺廣東話中有特別重要嘅角色，聲調嘅細微差別往往可以令語句嘅意思有顯著嘅改變。因此，喺參考同綜合其他資料，再加以改良後，呢本書特別採用同提倡一套句末助詞書寫方案，希望盡量做到一音一字，確保所有句末助詞嘅聲調都能夠準確標示。為咗達到呢個目的，我哋用咗一啲相對上冇咁常見、「口」字部嘅字。當中值得一提嘅係，有部份字（例如𠵝、咓、𠻺、𠺢等）現時唔容易用一般嘅中文輸入法輸入；尤其是「𠵝」字由於處於統一碼（Unicode）嘅擴展區B中，字型支援甚少，希望情況將來可以改善。

以下係呢個方案嘅總覽：